Rydyn ni wrth ein boddau’n cyhoeddi mai’r prif siaradwr ar gyfer Cynhadledd Flynyddol WISERD 2025 yw’r Athro Irene Hardill o Brifysgol Northumbria.
Bydd prif gyflwyniad yr Athro Hardill yn trin a thrafod sut y gwnaeth pandemig COVID-19 ddangos rôl hanfodol cymdeithas sifil ac elusennau wrth fynd i’r afael ag anghydraddoldebau ac anghenion heb eu diwallu. Bydd hefyd yn trafod ymchwil i weithredu gwirfoddol ledled y DU ac esblygiad hanesyddol cymdeithas sifil yn Lloegr.
Bydd yr Athro Hardill hefyd yn tynnu sylw at bwysigrwydd cydweithio rhyngddisgyblaethol ac arloesi methodolegol wrth ddeall a chefnogi cymdeithas sifil yn ystod cyfnodau o argyfwng.
Ymunodd yr Athro Hardill â Phrifysgol Northumbria yn 2010 yn Athro Polisi Cyhoeddus. Cyn hynny, bu’n Athro yn yr Ysgol i Raddedigion ym Mhrifysgol Nottingham Trent. Mae ganddi arbenigedd penodol ym maes gwirfoddoli, yn ogystal â chyd-gynhyrchu gwybodaeth ar y cyd rhwng y sectorau gwirfoddol a chymunedol.
Mae ymchwil ddiweddar Irene wedi cael cefnogaeth y Cyngor Ymchwil Economaidd a Chymdeithasol (ESRC) ac mae’n cynnwys arwain prosiect ar ysgogi gweithredu gwirfoddol yn ystod pandemig COVID-19. Yn ddiweddar, mae hi wedi cwblhau gwerthusiad o effaith COVID-19 ar arloesi methodolegol ar gyfer ESRC.
Yn ogystal â rheoli rhestr hir o brosiectau a gafodd eu hariannu gan ESRC, mae’r Athro Hardill wedi rheoli prosiectau gan noddwyr eraill, gan gynnwys yr Academi Brydeinig, Ymddiriedolaeth Leverhulme, Age UK, Uchel Gomisiwn Canada a Llywodraeth Ffrainc.
Mae Irene wedi cyhoeddi’n helaeth am newidiadau ym myd gwaith ym mhob ystyr y gair, boed hynny’n waith â thâl neu waith di-dâl, yn y cartref ac yn y gymuned.
Gobeithiwn y byddwch chi’n ymuno â ni i groesawu’r Athro Irene Hardill ac yn cadw eich lle yng Nghynhadledd Flynyddol WISERD eleni, a gynhelir ym Mhrifysgol Aberystwyth rhwng 30 Mehefin ac 1 Gorffennaf.