Mae Horse Race Politics yn wefan rad ac am ddim, ar ffurf gêm, sy’n caniatáu i ddefnyddwyr ddarogan canlyniadau gwleidyddol amrywiol, yn enwedig etholiad Senedd Cymru 2026. Dyma’r drydedd fersiwn o blatfform y gwnes i ei adeiladu ar gyfer fy ymchwil MSc a PhD. Y tro hwn, mae wedi’i ddylunio a’i adeiladu mewn cydweithrediad â’n partneriaid, Focus Games, sy’n gwmni dylunio gemau o Glasgow.
Mae’r wefan wedi’i hadeiladu gan ddefnyddio elfennau o gêm fel y sylfaen, yn hytrach na dewisiadau ariannol eraill sy’n bodoli eisoes, fel Polymarket a Kalshi. Nid oes unrhyw risg i ddefnyddwyr – dim ond pwyntiau a thlysau i’w hennill, a chyfleoedd i godi i frig y tabl.
Mae Horse Race Politics yn ffordd amgen a gweithredol o ddilyn gwleidyddiaeth, yn hytrach na chael newyddion a chyfryngau eraill yn anuniongyrchol. Mae’n caniatáu ichi ddarogan beth rydych chi’n meddwl fydd yn digwydd a chael sgôr yn unol â hynny. Mae hyn yn seiliedig ar ba mor fawr yw’r ganran rydych chi’n ei neilltuo i’r canlyniad cywir yn y pen draw a pha mor bell o’r dyddiad cau y gwnaethoch chi ddarogan.
Dros amser, bydd defnyddwyr yn meithrin eu sgiliau rhagweld gwleidyddol, ond yn bwysicach fyth, rydym yn gobeithio y bydd defnyddwyr yn dod yn fwy gwybodus am wleidyddiaeth ac yn cynyddu eu diddordeb yn y maes. Ar ben hynny, rydym am iddyn nhw deimlo’n fwy parod i gymryd rhan mewn sgyrsiau am faterion gwleidyddol.
Rydym yn darparu’r Persona Rhagolwg (Forecast Persona), sef dadansoddiad o sawl rhinwedd sy’n gysylltiedig â’ch gallu i ragweld, megis hyder, adweithedd ac amseroldeb. Ai chi yw’r ‘Saethwr Cudd’ (‘Sniper’), sy’n gwneud rhagolygon hyderus yn gynnar ac yn anaml yn eu diweddaru? Neu ai chi yw’r ‘Corwynt’, sy’n diweddaru eu rhagolygon yn ddramatig, drwy gadw golwg barcud ar y newyddion?
I ddechrau, ewch i wefan Horse Race Politics a chreu cyfrif. Yna gallwch fynd draw i’r dudalen ‘Rasys’ (‘Races‘) a gweld yr holl rasys sy’n barod i chi ymuno â nhw.
Addaswch y llithryddion yn seiliedig ar ba mor hyderus ydych chi mewn canlyniad penodol a chliciwch ar ‘Cyflwyno Rhagolwg’ (‘Submit Forecast’). Dyna ni! Dewch yn ôl a diweddarwch eich rhagfynegiad cyn gynted â phosibl i ennill cynifer o bwyntiau â phosibl. Pan fydd ras yn dod i ben, bydd pwyntiau’n cael eu dyrannu yn seiliedig ar yr hyn y gwnaethoch ei ddarogan. Bydd hyn yn eich symud i fyny (neu i lawr) y tabl, yn newid ystadegau eich Persona Rhagolwg, ac yn caniatáu ichi ennill tlysau.
Fodd bynnag, mae mwy i Horse Race Politics na rasys yn unig! Ewch i’r Hafan i gael trosolwg o’r wefan a rhestr wirio o Dasgau Dyddiol. Ewch i dudalen y Gymuned (‘Community’) i siarad â defnyddwyr eraill a darllen eu postiadau, ac ewch draw i The Inside Track i weld ein penodau wythnosol o bodlediad Horse Race Politics a’n herthyglau blog. Hefyd, cofiwch gadw llygad ar dudalen eich Proffil, sy’n rhoi gwybodaeth am eich amser ar y wefan, gan gynnwys rhinweddau, perfformiad, tlysau a gweithgaredd cyffredinol.
Bob wythnos ar bodlediad Horse Race Politics, byddwn yn trafod y diweddaraf am y rasys, a bydd gwahoddiad i westeion wneud eu rhagfynegiadau eu hunain a’u trafod. Nod Horse Race Politics, gan gynnwys y wefan sy’n seiliedig ar gêm a’r podlediad, yw rhoi’r holl wybodaeth sydd ei hangen arnoch chi i ymgysylltu ag etholiad Senedd 2026. Felly, os ydych chi’n meddwl eich bod chi’n gwybod yn well na phawb arall, cofrestrwch nawr a dechreuwch ragweld!
Mae Dr Louis Bromfield yn esbonio sut i ddechrau arni ar wefan Horse Race Politics yn y recordiad diweddar o Seminar Amser Cinio WISERD.